महिलालाई बाटो छेकी हातपात गर्न खोजेको अभियोगमा पक्राउ

महिलालाई बाटो छेकी हातपात गर्न खोजेको अभियोगमा प्रहरीले एक युवकलाई पक्राउ गरेको छ । सभापोखरी गाँउपालिका-२, हुत्तिखिम बस्ने २३ वर्षीय युवराज कार्की  पक्राउ परेका हुन् ।

कार्कीले गत आइतबार दिउँसाे लंखुवा खोलाको झोलुङे पुलमा स्थानीय महिलालाई बाटो छेकी हातपात गर्न खोजेको अभियोगमा पक्राउ गरिएकाे जिल्ला प्रहरी कार्यालयका प्रहरी निरीक्षक अशाेक कुमार जबेगुले बताए । अभियुक्त कार्कीलाई प्रहरी चौकी बाह्रबिसेबाट खटिएको प्रहरी टोलीले पक्राउ गरेकाे हाे ।

कार्कीउपर मुलुकी अपराध संहिता, २०७४ बमोजिम अभद्र व्यवहार मुद्दामा म्याद थप भई थप अनुसन्धान कार्य भइरहेको प्रहरी निरीक्षक जबेगुले जानकारी दिए ।