वार्षिकोत्सवको अवसरमा ७ जना सम्मानित

मादी नगरपालिका-४, ओखरबोटेस्थित नारायण माध्यमिक विद्यालयले ७ जनालाई सम्मान गरेको छ । विद्यालयको ६६औं वार्षिकोत्सवको अवसरमा उनीहरुलाई सम्मान तथा अभिनन्दन गरिएको हो ।

विद्यालयलाई अहिलेको अवस्थासम्म ल्याउन योगदान दिएका तथा दिइरहेका व्यक्तित्वहरुलाई सम्मान तथा अभिनन्दन गरिएको प्रधानाध्यापक दिपककुमार दाहालले बताए । उनका अनुसार हाल कार्यरत बालशिक्षिका सीता शंकर लोहारलाई नगदसहित प्रशंसापत्र र पूर्वशिक्षक एवं पूर्व विद्यालय सहायक डेढराज कोइरालालाई प्रशंसापत्रद्वारा सम्मान गरिएको छ ।

उपयुक्त स्थानको खोजी गरी हालको स्थानमा विद्यालय स्थानान्तरण गर्न तथा आर्थिक एवं भौतिक योगदान पुर्‍याएका पूर्वप्रधानपञ्च अर्जुनकुमार दाहाललाई अभिनन्दन गरिएको प्रधानाध्यापक दाहालले जानकारी दिए । त्यसैगरी, व्यवस्थापन समितिका पूर्वसदस्यद्वय एकनाथ शर्मा पौडेल र पवित्रराज कोइराला, शिक्षक-अभिभावक संघका पूर्वअध्यक्ष कमलप्रसाद दाहाल र विद्यालयका भवनहरु निर्माणमा संलग्न श्रमिक लालबहादुर गदाइली पनि सो अवसरमा विद्यालयद्वारा अभिनन्दित भएका छन् ।

वार्षिकोत्सवको अवसरमा विद्यालयको आर्थिक तथा प्रगति प्रतिवेदन प्रस्तुत गरिएको थियो ।