गोरखापत्रको नयाँ नेपाल पृष्ठमा याक्खा भाषा समावेश

लामो प्रयासपछि याक्खा भाषाले सरकारी छापा माध्यममा स्थान पाएको छ । आजदेखि गोरखापत्र दैनिकको नयाँ नेपाल बहुभाषा पृष्ठमा याक्खा भाषा समावेश भएको हो ।

नेपाल आदिवासी याक्खा संघ, केन्द्रीय समितिको नेतृत्वमा याक्खा मातृभाषाका विविध सामग्री गोरखापत्र दैनिकमा प्रकाशित भएको हो । ‘आज मिति २०८१ वैशाख २१ गते शुक्रबारदेखि सरकारी छापा गोरखापत्र दैनिक नयाँ नेपाल पृष्ठमा याक्खा भाषाका समाचारमुलक लेख, रचनाहरू प्रकाशित हुन थाल्नुको साथै यसको निरन्तरतामा नेपाल आदिवासी याक्खा संघ प्रतिवद्ध रहेको व्यहोरा सहर्ष जानकारी गराउँदछौं,’ संघका अध्यक्ष जितेन्द्र देवान कोङरेनले भनेका छन् ।

‘याक्खा जाति, याक्खा भाषा, संस्कृतिको संरक्षण, सम्वर्द्धन सँगसँगै सम्वद्ध नागरिक अधिकारका लागि नेपाल आदिवासी याक्खा संघ Nepal Indigenous Peoples’ Yakkha Organization (NIYO) काठमाडौं, २०५७ मा स्थापना/दर्ता भई प्राथमिक तहका सरकारी विद्यालयहरूमा याक्खा भाषाको पठनपाठन कक्षा १ देखि कक्षा ५ सम्म सञ्चालन गराउँदै आउनुका साथै इन्डिजिनयस टेलिभिजनबाट ‘याक्खारेन ओम्ना’ (याक्खा क्षेत्रको उज्यालो) कार्यक्रमसमेत प्रसारित भइरहेको सबैलाई सर्वविदितै छ,’ अध्यक्ष कोङरेनले उल्लेख गरेका छन् ।

गोरखापत्र संस्थानको व्यवस्थापनले पछिल्लोपटक याक्खा र डडेलधुरेली मातृभाषालाई समावेश गर्ने निर्णय गरेको थियो । अब गोरखापत्रमा सामग्री प्रकाशन हुने भाषाको संख्या ४३ पुगेको संस्थानले जनाएको छ । २०६४ साउन १ देखि गोरखापत्रले नयाँ नेपाल शीर्षकअन्तर्गत विभिन्न मातृभाषामा बहुभाषा (समावेशी) पृष्ठ प्रकाशन सुरु गरेको थियो ।

यसअघि, गोरखापत्रको नयाँ नेपाल पृष्ठमा याक्खा भाषा समावेशको लागि किरात याक्खा छुम्माले पनि निवेदन दिएको थियो । संस्थानको निर्णय र गोरखापत्रमा याक्खा भाषा प्रकाशन भएको विषयमा छुम्माका उपमहासचिव भरत याक्खाले आफूलाई यसबारे विस्तृत थाहा नभएकाे बताए । ‘गोरखापत्रमा याक्खा भाषा पनि प्रकाशित भयाे भनेर त सुनेको छु । तर, त्यहाँ प्रकाशित सामग्री, भाषा एवं व्याकरण भने मैले हेरेको छैन । हेरिसकेपछि के-के छ, के-के हुनुपर्ने भन्ने विषयमा कार्य समितिमा छलफल हुन्छ,’ भाषा विज्ञानका विद्यार्थीसमेत रहेका उपमहासचिव याक्खाले भने ।