‘युप्पारुङ’का नायक, नायिका र निर्माता सम्मानित

लिम्बु संस्कृतिमा आधारित चलचित्र युप्पारुङका नायक, नायिका र निर्माता सम्मानित भएका छन् । उनीहरुलाई याक्थुङ फिल्म्स प्रालिले सम्मान गरेको हो ।

गत शनिबार पाँचथरको फिदिममा युप्पारुङ प्रदर्शनको क्रममा चलचित्र सम्वद्ध तीनजनालाई संघले सम्मान गरेको हो । चलचित्रका नायक सानुबाबा सुुब्बा, नायिका जयन्ती सुहाङ र निर्माता सागर सिंगल अन्छङबोलाई प्रालिका प्रवन्ध निर्देशक सागर केरुङ र जिल्ला समन्वय समितिका उपप्रमुख यामकुमार आङ्बाेले सम्मानित गरेका हुन् । चलचित्रमा रविन श्रेष्ठको कथा, पटकथा तथा निर्देशन रहेको छ ।

यसअघि धरान र इटहरीमा चलचित्रको प्रदर्शन गरिएको थियो । अब यही वैशाख ५ गते बिर्तामोड र २९ गते दमकमा चलचित्र प्रदर्शन गर्ने तय भइसकेको युप्पारुङका निर्माता तथा कलाकार अन्छङबोले जानकारी दिए । उनका अनुसार आगामी दिनमा अन्यत्र पनि चलचित्रको प्रदर्शन गर्ने योजना छ ।