फेसबुकमार्फत चिनजान, बिहेको प्रलोभन देखाएर बलात्कार

बिहे गर्ने प्रलोभन देखाई बलात्कार गरेको अभियोगमा एक युवक पक्राउ परेका छन् । प्रहरीका अनुसार सामाजिक सञ्जाल फेसबुकमा चिनजान भई फोनमा कुराकानीपछि अभियुक्त र पीडित युवती भेट भएका थिए ।

तनहुँको भिमाद नगरपालिका-२ का ३७ वर्षीय अभिमानसिं आले जिल्ला प्रहरी कार्यालय ओखलढुंगाको सहयोगमा पक्राउ परेका हुन् । उनलाई ओखलढुंगाको सिद्धिचरण नगरपालिका-११, रमाइलोडाँडाबाट गत शनिबार पक्राउ गरिएको जिल्ला प्रहरी कार्यालय संखुवासभाले जनाएको छ ।

अभियुक्त आलेले फेसबुकको माध्यमबाट चिनेका संखुवासभाकी एक युवतीलाई बिहे गर्ने आश्वासन दिँदै सदरमुकाम खाँदबारीको एक होटलमा लगी बलात्कार गरेको अभियोग छ । घटनापछि उनले फेसबुक निष्कृय बनाई फरार भएका थिए ।

पीडित युवतीलाई अभियुक्तको वास्तविक नामथर र ठेगानासमेत थाहा नभएको प्रहरीले जनाएको छ । प्रहरीका अनुसार युवतीको अभिभावकहरु सम्पर्कमा आएपछि सुक्ष्म अनुसन्धान गरेको र अभियुक्तलाई पक्राउ गर्न सकिएको हो ।

पक्राउ परेका आलेलाई सोमबार नै जिल्ला अदालतबाट म्याद लिई मुलुकी अपराध संहिता २०७४ अनुसार अनुसन्धान भइरहेको जिल्ला प्रहरी कार्यालय संखुवासभाका मिडिया समन्वय अधिकृत इन्स्पेक्टर अशोक कुमार जबेगुले जानकारी दिए ।