कोशीको मुख्यमन्त्रीमा हिक्मत कार्की नियुक्त

कोशी प्रदेशकाे मुख्यमन्त्रीमा हिक्मत कार्की नियुक्त भएका छन् ।नेकपा एमाले कोशी प्रदेश संसदीय दलका नेता कार्की कोशी प्रदेशकाे मुख्यमन्त्री नियुक्त भएका हुन् ।

प्रदेश प्रमुखले संविधानकाे धारा १६८ काे उपधारा ५ अनुसार सरकार गठन आह्वान गरेपछि आज बिहान एमाले नेता कार्कीले मुख्यमन्त्रीमा दाबी पेस गरेका थिए । उनलाई एमाले र माओवादी केन्द्रका ५२ सांसदकाे समर्थन छ । ९३ सदस्यीय प्रदेश सभामा बहुमतका लागि ४७ मत चाहिन्छ ।

उनलाई समर्थन गर्ने सांसदको हस्ताक्षर सनाखत गरिएकाे थियाे । सनाखतपछि प्रदेश प्रमुख पर्शुराम खापुङले कार्की मुख्यमन्त्री नियुक्त भएको घाेषणा गरेका हुन् ।

सरकार गठन आह्वानका विरुद्ध निवर्तमान मुख्यमन्त्री केदार कार्की सर्वाेच्च अदालत पुगेका छन् ।