संखुवासभा जिल्ला लिग फुटबलको उपाधि लोहोरुङलाई

खाँदबारी-३, मानेभञ्ज्याङमा शनिबार सम्पन्न संखुवासभा जिल्ला ‘ए’ डिभिजन लिग फुटबल प्रतियोगिता २०८०/८१ को उपाधि लोहोरुङ क्लब, पाङमाले जितेको छ ।

लिक कम नकाउटको आधारमा सञ्चालित प्रतियोगितअन्तर्गत शनिबार भएको फाइनलमा लोहोरुङले धर्मदेवी-२, तामाफोकको मिरमिरे युवा क्लबलाई पराजित गर्दै उपाधि हात पारेको हो । लोहोरुङले उपाधिसँग ट्रफी र नगद ५० हजार प्राप्त गरेको छ । उपविजेता मिरमिरेले ट्रफी र नगद ३० हजार प्राप्त गर्‍यो ।

फाइनलको निर्धारित अवधि गोलरहित बराबरीमा सकिएको थियो । ट्राइब्रेकरमा मिरमिरेका दुई खेलाडी चुक्दा लोहोरुङ उपाधिको हकदार बन्यो । विजेता र उपविजेता दुवै टोली समूह चरणका विजेता हुन् । सेमिफाइनलमा लोहोरुङले मानेभञ्ज्याङको एड्भान्स क्लबलाई र मिरमिरेले चैनपुरको नवयुग क्लबलाई पराजित गरेको थियो ।

प्रतियोगितामा सहभागी आठ क्लबलाई दुई समूहमा विभाजन गरेर लिग चरणका खेलहरु खेलाइएको प्रतियोगिता संयोजक जिल्लामान राईले जानकारी दिए ।