चैनपुरको पोखरीबजारमा यार्सागुम्बासहित युवक पक्राउ

चैनपुरको पोखरीबजारमा यार्सागुम्बासहित एक युवक पक्राउ परेका छन् । पाँचखपन नगरपालिका वडा नम्बर-९, चौरीखर्क घर भई हाल चैनपुर नगरपालिका वडा नम्बर-४ बस्ने ३९ बर्षीय रिमकुमार लिम्बु पक्राउ परेका हुन् ।

उनलाई विशेष सूचनाको आधारमा गत इलाका प्रहरी कार्यालय चैनपुरबाट खटिएको चेकिङ टोलीले चैनपुर नगरपालिका वडा नम्बर-३ पोखरी बजारमा सवारी साधन चेकजाँच गर्ने क्रममा गत सोमबार पक्राउ गरेकाे हाे । चैनपुर नगरपालिका वडा नम्बर-२ चित्लाङबाट चैनपुरतर्फ आउँदै गरेको प्रदेश १-०२-०४१ प ४६०२ नम्बरकाे मोटरसाइकलमा सवार लिम्बुलाई झोलाभित्र लुकाई राखेको छुटपुर्जी नभएको ४४४ ग्राम यार्सागुम्बासहित पक्राउ गरिएकाे प्रहरीले जनाएकाे छ । प्रहरीले उनकाे साथबाट नगद एक लाख ११ हजार समेत बरामद गरेकाे छ ।

पक्राउ परेका लिम्बुलाई बरामद सामानसहित आवश्यक कारबाहीका लागि डिभिजन वन कार्यालय, खाँदबारी पठाइएकाे प्रहरीले जनाएकाे छ ।