एसईई र कक्षा १२ उत्तीर्ण संखुवासभाका ७८ विद्यार्थी सम्मानित

नेकपा एमाले संखुवासभा-काठमाडौं सम्पर्क मञ्चले यस वर्षको माध्यमिक शिक्षा परीक्षा (एसर्ईई) र कक्षा १२ को परीक्षा उत्तीर्ण गरेका विद्यार्थीहरुलाई सम्मान गरको छ ।

मञ्चका उपाध्यक्ष राजेश श्रेष्ठका अनुसार एसईई उत्तीर्ण ७१ र कक्षा १२ उत्तीर्ण ७ जना विद्यार्थीलाई शनिबार काठमाडौं एक कार्यक्रम आयोजना गरी सम्मान गरिएको हो । सो अवसरमा विद्यार्थीहरुलाई शिक्षा तथा सामाजिक क्षेत्रका व्यक्तित्वहरुले अभिमुखीकरण गरेका थिए ।

सीएलसीआरका राहुल बिशुंखेले एसईई र कक्षा १२ उत्तीर्ण गरिसकेपछि कस्ता संकाय र विषय छान्ने भन्ने विषयमा विद्यार्थीहरुलाई जानकारी दिएका थिए । त्यस्तै यूडब्लूएस नेपालका डाइरेक्टर सुर्य कार्कीले युवा सशक्तीकरण उद्यमशीलताका विषयमा अभिमुखीकरण गरेका थिए । कार्यक्रममा उद्यमी तथा विकास अभियन्ता तेज ढकालले नेपालको सन्दर्भमा शैक्षिक पेशा, व्यवसाय र राजनीतिबीचको अन्तरसम्बन्ध, डा. सुजन कडरियारले शैक्षिक पेशा र पूर्वराजदूत डा. अर्जुन कार्कीले युवा नेतृत्वका विषयमा भनाइहरु राखेका थिए ।

कार्यक्रमका प्रमुख अतिथि पूर्व प्रतिनिधिसभा सदस्य एवं नेकपा एमाले प्रचार तथा प्रकाशन विभाग प्रमुख राजेन्द्र गौतमले विद्यार्थीहरुलाई बधाइ तथा शुभकामना दिए ।