याक्थुङ चलचित्र क्षेत्रलाई योगदान पुर्‍याउने ३ जना सम्मानित

याक्थुङ मुन्चइत चोक सयङले तीनजना व्यक्तित्वलाई सम्मान गरेको छ । गत बुधबार ललितपुरस्थित चुम्लुङहिममा सम्पन्न सयङको १५औं स्थापना दिवसको अवसरमा किशोर सुब्बा, मनु नेम्बाङ र समीर आङबुहाङ सम्मानित भएका हुन् ।

याक्थुङ चलचित्र क्षेत्रलाई योगदान पुर्‍याएबापत उनीहरूलाई सम्मान गरिएको मुन्चइत चोक सयङका संघीय अध्यक्ष सागर केरूङले बताए । सम्मानित व्यक्तित्वहरूलाई मुन्धुमविद येहाङ् लावती, किरात याक्थुङ चुम्लुङका संघीय अध्यक्ष प्रेम येक्तेन र आदिवासी जनजाति मातृभाषी चलचित्र प्रवर्द्धन समिति चलचित्र विकास बोर्डका संयोजक ज्योतिराज राईले दोसल्ला ओढाएर सम्मानपत्र प्रदान गरेका थिए  ।

सुब्बाले २०४४ सालमा नेपाली कथानक चलचित्र ‘मानिस’बाट चलचित्र निर्देशन सुरु गरी तुम्दङ् (२०४९), आनि साक्थिम (२०५४), लाजेरेन् थोक्ला (२०६४), अम्लारी फुङ् (२०६९), हेल्लुक्वा (२०७०), साम (२०७१) थेत्लङ् (७८) जस्ता ऐतिहासिक चलचित्रहरु र दर्जनौं लिम्बु म्युजिक भिडियो निर्माण/निर्देशन गरि याक्थुङ चलचित्र क्षेत्रमा महत्वपूर्ण योगदान पुर्‍याएका छन् । उनको पुर्ख्यौलीघर ताप्लेजुङको फावाखोला हो ।

सयङले चर्चित पालाम गायिका नेम्बाङलाई याक्थुङ चलचित्र क्षेत्र र समुदायलाई महत्वपूर्ण योगदान पुर्‍याएको भन्दै सम्मान गरेको छ । पाँचथरको फाल्गुनन्द गाउँपालिका स्थायी घर भएकी नेम्बाङले २०५३ सालबाट सांगीतिक यात्रा सुरु गरेर आनि साक्थिम, मासेमी, लुङमा तुक्कील्ले, खाप्पुना मरङ्ना, माराम, चेसुङ्, फुङ्वामा, हेत्लुक्वा, लाम्देङमा, लोजिमा, सुगुप, युक्पुङजस्ता ऐतिहासिक लिम्बु चलचित्रहरु र सयौं लिम्बु गीतहरुमा स्वर दिएकी छन् ।

अर्का सम्मानित व्यक्तित्व आङ्बुहाङले ऐतिहासिक लिम्बु चलचित्र मासेमी (२०५६) र स्काई म्युजिक प्रालिमार्फत सयौं गीत निर्माण तथा बजार व्यवस्थापन गरेर याक्थुङ चलचित्र क्षेत्र र समुदायलाइ महत्वपूर्ण योगदान पुर्‍याएको सयङले उल्लेख गरेको छ । उनको पुर्ख्यौली घर आठराइ त्रिवेणी गाउँपालिका-५, नेसुम रहेको छ ।

चलचित्र बोर्डमा दर्ता भएको मुन्चइत चोक सयङ किरात याक्थुङ चुम्लुङबाट समेत मान्यताप्राप्त छ । याक्थुङ चलचित्रलाई प्रवर्द्धन गर्ने उद्देश्यले स्थापित संस्थाले सेन्सर समिति पनि गठन गरेको छ ।