संखुवासभाको मकालुमा ट्याक्टर दुर्घटना, २ जनाको घटनास्थलमै मृत्यु

संखुवासभाको मकालु गाउँपालिका-३ मा आज बिहान भएको ट्याक्टर दुर्घटनामा दुईजनाको मृत्यु भएको छ । प्रहरीका अनुसार दुर्घटनामा चालक र सहचालकको घटनास्थलमानै मृत्यु भएको हो ।

बरुण दोभानबाट खाँदबारी आउने क्रममा प्रदेश नम्बर १-०२-००३ त १४३७ नम्बरको ट्याक्टर खाँदबारी-किमाथांकका सडक खण्डको समटारमा दुर्घटना भएको जिल्ला प्रहरी कार्यालयका सूचना अधिकारी प्रहरी निरीक्षक रामकुमार लामिछानेले जानकारी दिए । उनका अनुसार दुर्घटनामा खाँदबारी  नगरपालिका-८, बिष्णेधाराका चालक १९ वर्षीय किरण श्रेष्ठ र सहचालक १७ वर्षीय उदित श्रेष्ठको मृत्यु भएको हो ।

खाँदबारी आउने क्रममा रहेको खाली ट्याक्टर भीरबाट ३ सय मिटर तल खसेको थियो । दुर्घटनाको विषयमा थप अनुसन्धान भइरहेको प्रहरीले जनाएको छ ।