अरुण भ्याली फुटबल प्रतियोगिताको मिति घोषणा

नवौं अरुण भ्याली फुटबल प्रतियोगिता सञ्चालन हुने मिति घोषणा भएको छ । आगामी कात्तिक ७ देखि १२ गतेसम्म प्रतियोगिता सञ्चालन हुने आयोजक एड्भान्स क्लब मानेभञ्ज्याङले जानकारी दिएको हो ।

प्रतियोगिताका खेलहरु साविकझैं खाँदबारी नगरपालिका-३, मानेभञ्ज्याङस्थित महेन्द्र माध्यमिक विद्यालयको खेलमैदानमा सञ्चालन हुने आयोजकले जनाएको छ । प्रतियोगिताको विजेताले उपाधिसहित नगद २ लाख रुपैयाँ प्राप्त गर्नेछ । उपविजेताले एक लाख र सान्त्वना पुरस्कार दुई टिमले २५/२५ हजार रुपैयाँ प्राप्त गर्नेछन् ।

प्रतियोगितालाई खाँदबारी नगरपालिका, कोशी प्रदेश खेलकुद विकास बोर्ड र ३ नम्बर वडा कार्यालय, खाँदबारीले विशेष सहयोग गरेको छ । सहभागी टिम संख्या भने टुंगो लागिनसकेको क्लबका अध्यक्ष जिल्लामान राईले बताए । उनका अनुसार यस वर्ष जिल्ला भित्र र बाहिरका गरी ८ देखि बढीमा १२ टिमलाई प्रतियोगितामा सहभागी गराइनेछ । ‘धेरै टिमले सहभागी हुन चाहिरहेका छन् । समग्र अवस्था हेरेर हामी सहभागी टिमबारे चाँडै टुंगोमा पुगेर विस्तृत जानकारी गराउँछौं,’ उनले भने ।

जिल्लाकै चर्चित तथा प्रतिष्ठित यस प्रतियोगिताको उपाधि गत वर्ष पञ्चकन्या फुटबल क्लब, धर्मदेवी, संखुवासभाले जितेको थियो ।