पहिलो याक्खा हाक्पारे ‘ओम्माङ्बा’ निर्माण

याक्सिगुम मिडिया प्रा.लि.को ब्यानरमा पहिलो याक्खा हाक्पारे भिडियो ‘ओम्माङ्बा’ निर्माण भएको छ । गोकुल सोम्याहाङ्गद्वारा निर्मित उक्त भिडियोमा देउ कृष्ण् लिंखा (राई)को निर्देशन रहेको छ । सहनिर्माताहरुमा खगेन सिं सोम्याहाङ्ग, वालगोपाल सोम्याहाङ्ग, सुजता जिमी र देवी याक्खा रहेका छन् ।

भिडियोमा अजय जिमी, गोकुल सोम्याहाङ्ग, हिरा सोम्याहाङ्ग, बिमला जिमी, सरिता जिमी, सरिता जिमी, राजकुमारी कोङ्रेन, सञ्जिता जिमी, रमेश लिम्बुखिम, गजेन्द्र पुपाङ्गु, मिजन सोम्याहाङ्ग, सविता जिमी लगायतको अभिनय तथा प्रस्तुति रहेको छ । मनु नेम्वाङ र शिव सम्बाहाम्फेले हाक्पारेमा स्वर दिएका छन् भने लय संकलन अजय जिमी याक्खाको रहेको छ । निर्माता सोम्याहाङ्गकै शब्द रहेको छ ।

याक्खा जातिको मुख्य बसोवास रहेको जिल्ला संखुवासभाको आँखीभुईं, फाक्लिङमा भिडियोको छायाँकन गरिएको हो । भिडियोलाई याक्सिगुम मिडियाको अफिसियल युट्युब च्यानल ‘@ourdokeni’मार्फत माघ २१ गते सोमबार सार्वजनिक गर्ने तय भएको कम्पनीले जनाएको छ ।

याक्खा जातिमा प्रचलित हाक्पारे एक मौलिक गायनशैली हो । यसमा खासगरी मुन्थुमका साथै संस्कार-परम्परा, जीवन-जगत र मानव जीवनका विविध पक्षबारे व्याख्या हुन्छ । गीत र भिडियो निर्माणले प्रचलन कम हुँदै गएको हाक्पारेलाई जगेर्ना तथा दस्तावेजीकरण गर्न महत्वपूर्ण योगदान पुग्ने याक्खा समुदायका अग्रजहरुले बताएका छन् ।