हाङथुम कप : लिखु भुजी बन्यो च्याम्पियन

४६औं हाङथुम कपको उपाधि रामेछापको लिखु भुजी रामेछाप क्लबले जितेको छ । फाइनलमा सुनसरीको सिर्जना युथ क्लबलाई पराजित गर्दै लिखु भुजी च्याम्पियन बनेको हो ।

लिखु भुजीले उपाधिसँगै नगद २ लाख २० हजार २ सय र उपविजेता सिर्जना युथले १ लाख १० हजार १ सय प्राप्त गर्‍यो । संखुवासभाको मादी नगरपालिका-३, मुलखर्कमा शनिबार सम्पन्न प्रतियोगिताको फाइनलमा लिखु भुजीका लागि करण मगरले पेनाल्टीमार्फत गरेको एक मात्र गोल नै उपाधिका लागि निर्णायक बन्यो । खेलको ७२औं मिनेटमा सुनसरीका खेलाडीले डि एरियामा फल गरेपछि रामेछापले पेनाल्टीको अवसर पाएको थियो । उक्त अवसरको सदुपयोग गर्दै करणले सहजै बललाई जाली चुमाएपछि लिखु भुजी उपाधिको हकदार बनेको हो ।

प्रतियोगितामा उत्कृष्ट खेलाडी सिर्जना युथका नगेन राई र उत्कृष्ट गोलरक्षक लिखु भुजीका मिलन श्रेष्ठ घोषित भए । सर्वाधिक गोलकर्ताको पुरस्कार चुलाचुली झापाका तीर्थ बस्नेत र लिखु भुजीका मनजित गुरुङले पाए ।

माघ २० बाट सुरु भएको प्रतियोगितामा झापा, धनकुटा, सुनसरी, रामेछाप र संखुवासभाका गरी ८ टोली सहभागी थिए । यस प्रतियोगितालाई जिल्लाकै पहिलो फुटबल प्रतियोगिता मानिन्छ । मूलखर्कमा हरेक वर्ष बसन्तपञ्चमीको अवसरमा २०३५ सालबाट फूटबल प्रतियोगिता आयोजना हुँदै आएको हो ।