विदुषी योगमाया हिमालयन आयुर्वेद विश्वविद्यालयकाको केन्द्रीय कार्यालय उद्घाटन

विदुषी योगमाया हिमालयन आयुर्वेद विश्वविद्यालयको केन्द्रीय कार्यालय उद्घाटन गरिएको छ । खाँदबारीस्थित जिल्ला समन्वय समितिको कार्यालयमा विश्वविद्यालयका अध्यक्ष डा. अर्जुन कार्कीले केन्द्रीय कार्यालय सोमबार उद्घाटन गरेका हुन् ।

विश्वविद्यालयको आफ्नै भवन निर्माण नभएकाले तत्काल कार्यलय सञ्चालनका लागि अस्थायी कार्यालय स्थापना गरिएको अध्यक्ष कार्कीले जानकारी दिए । पर्याप्त नीति निर्माण हुन नसक्दा कर्मचारी नियुक्ति हुन नसकेको र कर्मचारी नभएकाले विश्वविद्यालय सञ्चालनमा अन्योलता छाएको अध्यक्ष कार्कीको भनाई छ । यस आयुर्वेद विश्वविद्यालय आयुर्वेद पढ्नेका लागि शैक्षिक हब बन्ने र जडिवुटीहरुको भण्डार रहेको अरुण उपत्यकामा आयुर्वेद विश्वविद्यालय सञ्चालनमा आउँदा यहाँका जडिवुटीहरुले मूल्य पाउने उनले बताए ।

विश्वविद्यालयका अध्यक्ष कार्कीको उपस्थितिमा जिल्ला समन्वय समितिको सभाहलमा विश्वविद्यालय निर्माण प्रकृयाका बारेमा छलफल कार्यक्रमसमेत सम्पन्न भएको छ । अध्यक्ष कार्कीले विश्वविद्यालय स्थापनामा हालसम्म भएका प्रगति, चुनौती तथा कानुनी जटिलताका बारेमा जानकारी गराए । कानुनी अड्चनका कारण कर्मचारी, रजिष्टार तथा कुलपति समस्या भएको उनको भनाई थियो ।

विश्वविद्यालय सञ्चालनका लागि संखुवासभाको खाँदबारी नगरपालिका-९ र भोजपुर जिल्लाको षडानन्द नगरपालिका-६ मा जग्गा अधिग्रहण गरिएको छ । आवश्यकमध्ये भोजपुरमा दुई सय ३३ र संखुवासभामा तीन सय ७२ रोपनी जग्गा अधिग्रहणका लागि रकम निर्धारण गरी अधिकांश जग्गा प्राप्ति भएको छ ।

तत्कालीन समाजमा विद्यमान अन्याय, अत्याचार, भ्रष्टाचार, महिला हिंसा, लैंगिक विभेद तथा जातीय उत्पीडन आदि विकृतिविरुद्ध योग, ध्यान र भजन कीर्तनका माध्यमबाट आध्यात्मिक तवरले आवाज बुलन्द गर्न विदुषी योगमाया न्यौपानेले महत्वपूर्ण भूमिका निर्वाह गरेकी थिइन् । न्यौपानेले समाज सुधारका लागि जीवनभर संघर्ष गरेर आफ्ना ६७ जना अनुयायीसहित अरूण नदीमा जलसमाधि लिएकी थिइन् । उनैको नाममा विश्वविद्यालय सञ्चालन गर्न लागिएको हो ।