जिल्लाकै ‘पहिलो’ फुटबल प्रतियोगिता हाङथुम कपको ४६औं संस्करण आजदेखि सुरु

संखुवासभाको मादी नगरपालिका-३, मूलखर्कमा ४६औं संस्करणको फुटबल प्रतियोगता ‘हाङथुम कप-२०८१’ सुरु भएको छ । आजदेखि आमन्त्रित हाङथुम कप पुरुष फुटबल प्रतियोगिता सुरु भएको हो ।

प्रतियोगिताको उद्घाटन खेलमा मिरमिरे युवा क्लब तामाफोकलाई ३-१ गोलले पराजित गर्दै सिर्जना युवा क्लब सुनसरीले विजयी सुरुवात गरेको छ । प्रतियोगिताको दोस्रो दिन रामेछापको लिखु भुजी रामेछाप युवा क्लब र आयोजक हाङथुम क्लब बीच प्रतिस्पर्धा हुने तालिका छ ।

हाङथुम क्लबले २०३५ सालदेखि हरेक वर्ष बसन्तपञ्चमीको अवसरमा फुटबल प्रतियोगिता आयोजना गर्दै आएको छ । यस प्रतियोगितालाई जिल्लाकै पहिलो फुटबल प्रतियोगिता मान्ने गरिएको छ ।

यस वर्ष प्रतियोगितामा सिर्जना युवा क्लब धरान, लिखु भुजी रामेछाप युवा क्लब रामेछाप, डाडाँबजार युवा क्लब धनकुटा, चुलाचुली स्पोर्टिङ क्लब झापा र संखुवासभाबाट न्यू युवा क्लब आँखीभूई, मिरमिरे युवा क्लब तामाफोक, एड्भान्स क्लब मानेभञ्याङ र आयोजक हाङथुम क्लब सहभागी छन् । प्रतियोगिताको विजेताले उपाधिसहित नगद दुई लाख २० हजार २ सय २२ तथा उपविजेताले एक लाख १० हजार १ सय ११ प्राप्त गर्नेछ ।