मुक्कुम्लुङ केबलकार आन्दोलन स्थगित, ६ बुँदे सहमति

ताप्लेजुङस्थित मुक्कुम्लुङ (पाथीभरा)मा केबलकार निर्माण गर्न लागिएपछि सुरु भएको आन्दोलन स्थगित भएको छ । गृह मन्त्रालयद्वारा गठित वार्ता टोली र सम्बद्ध संस्थाका प्रतिनिधिहरुबीच भएको सहमतिसँगै आन्दोलन स्थगित भएको हो ।

हिजोदेखि काठमाडौंमा सुरु भएको द्विपक्षीय वार्तामा आज साँझ दुवै पक्षबीच ६ बुँदे सहमति भएको छ । विवाद बढ्दै गएपछि अरुण पूर्वका लिम्बुवानअन्तर्गत ९ जिल्लामा आन्दोलनरत पक्षले यातायात बन्द र विरोधका विभिन्न कार्यक्रम गर्दै आएका थिए । मुक्कुमलुङ संरक्षण संयुक्त संघर्ष समिति, केबलकार खारेजी संघर्ष समिति, मुक्कुम्लुङ ताङ्सेप चुम्भो र मुक्कुम्लुङ संरक्षण अन्तरदलीय संघर्ष समितिले असहमति जनाउँदै आन्दोलन थालेपछि स्थिति तनावग्रस्त बनेको थियो ।

सहमतिअनुसार पाथीभरा केबलकारको स्टेसनमाथिको निर्माण कार्य स्थगन गर्ने र स्टेसनका सन्दर्भमा आगामी वार्तामा विस्तृत छलफल गर्ने तय भएको छ । सरकारले घोषणा गरेबमोजिम आन्दोलनका क्रममा घाइते भएकाहरुको निःशुल्क र प्रभावकारी रुपमा स्वास्थ्य उपचार गर्ने, २०८१ माघ १२ गते भएको घटनाको विषयमा छानबिन गरी कानुनी कारबाही गर्ने सहमति पत्रमा उल्लेख छ । आन्दोलनका क्रममा थुनामा रहेका थुनुवा बन्दीहरुको विनाशर्त तत्काल रिहाइको प्रक्रिया प्रारम्भ गर्न सरकार सहमत भएको छ ।

मुक्कुमलुङ संरक्षक पक्षबाट अनिश्चितकालीन यातायात बन्द स्थगन गर्ने र मुक्कुमलुङ संरक्षक पक्षधरहरुबाट वार्ताका दौरानमा माग भएका पाथीभरा केबलकार आयोजना निर्माणमा रहेका असहमति लगायतका विषयका सम्बन्धमा विस्तृत छलफल गर्न अर्को वार्ता माघ २७ गते बिहान ११ बजे बस्ने पनि दुवै पक्ष सहमत भएका छन् ।

सहमतिपत्र: