‘आदिवासी जनजाति उत्थान राष्ट्रिय प्रतिष्ठानलाई आदिवासी जनजाति मन्त्रालय बनाउनुपर्छ’

आदिवासी जनजाति उत्थान राष्ट्रिय प्रतिष्ठानले आज २४औं स्थापना दिवस मनाएको छ । यस अवसरमा प्रतिष्ठानले शुभकामना आदान-प्रदान तथा विविध सांस्कृतिक कार्यक्रम आयोजना गरेको थियो ।

कार्यक्रममा प्रतिष्ठान स्थापनाकालमा महत्वपूर्ण भूमिका खेलेका अग्रजहरुलाई सम्मान गरिएको थियो । सम्मानित हुनेमा प्रतिष्ठानका पूर्वसदस्यसचिव रविन्द्रनाथ अधिकारी, टेकनारायण राजवंशी, सन्तवहादुर गुरुङ, विश्वदत्त आङबुहाङ, समाजशास्त्री डा. कृष्णबहादुर भट्टचन र रामलक्ष्मण चौधरी रहेका छन् ।

कार्यक्रमका प्रमुख अतिथि उपप्रधान तथा सहरी विकासमन्त्री प्रकाशमान सिंहले संविधान संशोधन भनेको अधिकार कटौती नभएर थप सुधारका लागि हुन लागेको बताए । ‘आदिवासी जनजातिले २०७२ सालको संविधानबाट प्राप्त गरेका अधिकारहरुको संरक्षण गर्नुपर्छ । र, आफ्नो दायित्य सम्झँदै अधिकारको संरक्षण र माग गर्नुपर्छ,’ उनले भने ।

नेपाल आदिवासी जनजाति महासंघका अध्यक्ष गेल्जे लामा शेर्पाले प्रतिष्ठानलाई आदिवासी जनजाति मन्त्रालय बनाउनेतर्फ लाग्नुपर्ने बताए । उनले भने, ‘आदिवासी जनजातिहरुको संघसंगठन बचाउने र आदिवासीका विषयमा अध्ययन अनुसन्धान गर्ने एकमात्र संस्था प्रतिष्ठान भएकाले सरकारले प्रतिष्ठानको बजेट बढाउनुपर्छ । अब बिस्तारै प्रतिष्ठानलाई आदिवासी जनजाति मन्त्रालय बनाउनुपर्छ ।’ आउने वर्षको बजेटमा प्रतिष्ठानको लागि ५० करोड रुपैयाँ छुट्याउन अध्यक्ष शेर्पाले आग्रह गरे । उनले आदिवासी जनजातिहरुलाई प्रतिष्ठान र आयोग दुईवटै निकाय आवश्यक पर्ने पनि बताए । संविधान संशोधन गर्दा धर्मनिरपेक्षता, संघीयता, समानुपातिक समावेशीलगायत खारेजी गर्ने कुरा जनजाति महासंघका लागि मान्य नहुने प्रष्ट पारे । अध्यक्ष शेर्पाले दिनदहाडै मुक्कुम्लुङमा आदिवासीमाथि विकासको नाममा गोली चलाएकोप्रति विरोधसमेत जनाए ।

कार्यक्रममा राष्ट्रियसभा सदस्य सुरेश आलेमगरले विकासको नाममा बाहुनवादी सत्ताले आदिवासी भूमिको नष्ट गर्दै गएको आरोप लगाए । राज्यबाट अझै खतरा भएकाले सबै एकजुट भएर लाग्नुपर्ने उनको भनाई छ । प्रतिनिधिसभा सदस्य सीता गुरुङले पहिचानको कुरा उठाउँदैमा देश विथोल्ने लगायतको आरोपहरु लगाउने गरिएको बताइन् । पूर्वमन्त्री शेरबहादुर तामाङले आदिवासी जनजातिहरुको ज्ञान सिपलाई राष्ट्रियकरण गर्न सके नेपालको समृद्धि छिट्टै हुने धारणा राखे । पूर्वमन्त्री पद्मा अर्यालले आदिवासी जनजातिको मुख्य माग आन्दोलनको दिशा मोडिएकाले सबैले बेलैमा सोचेर अगाडि बढ्नुपर्ने बताइन् ।

(तस्बिर श्रोत: विश्वासदीप तिगेलाको फेसबुक)