संखुवासभाबाट एसईईमा ३ हजार १२० परीक्षार्थी, १७ वटा परीक्षा केन्द्र

माध्यमिक शिक्षा परीक्षा (एसईई) परिक्षा भोलिदेखि देशभर शुरु हुँदैछ । संखुवासभाबाट यो वर्ष तीन हजार १२० जना विद्यार्थी सहभागी हुने भएका छन् ।

यो वर्ष संखुवासभाबाट एसईई परिक्षामा नियमित तर्फ दुई हजार ३ सय ९८ जना र ग्रेड वृद्धितर्फ ७ सय २२ जनाले परिक्षा दिने शिक्षा विकास तथा समन्वय इकाइ संखुवासभाका कार्यालय प्रमुख गोपालमान भण्डारीले बताए । एसईई परिक्षा यही चैत्र ७ देखि १९ गते सम्म सञ्चालन हुने भएकाले परिक्षालाई शान्तिपूर्ण, व्यवस्थित र मर्यादित बनाउनका लागि सम्पूर्ण तयारी पूरा भएको कार्यालय प्रमुख भण्डारीले जानकारी दिए ।

यो वर्ष संखुवासभामा १७ वटा एसईई परिक्षा केन्द्र तोकिएको छ । यो बर्ष हिमालय माध्यमिक विद्यालय खाँदबारीको दुईवटा केन्द्रमध्ये एउटा केन्द्र हटाइएको छ भने नुम र बाह्रबिसेमा एक/एक केन्द्र थप गरिएको कार्यालय प्रमुख भण्डारीले बताए । जिल्लाका ७३ वटा माध्यमिक विद्यालय र एउटा खुल्ला विद्यालय गरी ७४ वटा विद्यालयका विद्यार्थीहरु सहभागी हुने शिक्षा विकास तथा समन्वय इकाइ संखुवासभाले जनाएको छ ।

सबै परिक्षा केन्द्रसम्म प्रश्नपत्र र उत्तरपुस्तिका पुगिसकेको छ । विगतमा जस्तै होमसेन्टर दिइएको छैन भने जुन विद्यालयमा केन्द्र तोकिएको छ सोही विद्यालयका प्रधानाध्यापकलाई केन्द्राध्यक्षको जिम्मेवारी दिएको शिक्षा विकास तथा समन्वय इकाइ संखुवासभाले जनाएको छ ।

२०८० सालको एसईई)का लागि जिल्लाबाट २ हजार ७०४ विद्यार्थीले फाराम भरेका थिए । यसमध्ये ३५ जना परीक्षामा अनुपस्थित रहे भने २८ जना अघिल्लो वर्षकै विद्यार्थी थिए । खुद २०८० सालको मात्र विद्यार्थी गणना गर्दा जिल्लाको एईई उत्तीर्ण (ग्रेडिङ भएका) प्रतिशत २४.६१ प्रतिशत थियो । अर्थात परीक्षामा सहभागी २ हजार ६४१ मध्ये ६५० जना मात्र ग्रेडिङ भएका थिए भने १ हजार ९९१ ननग्रेड भएका थिए ।

यस वर्षको परीक्षामा देशभरमा विद्यार्थीको संख्या गत वर्षभन्दा ४९ हजार दुई सय ८६ जना बढेर पाँच लाख १४ हजार ७१ जना छन् । गत वर्ष २०८० को एसइई परीक्षामा चार लाख ६४ हजार सात सय ८५ परीक्षार्थी सहभागी थिए ।

दुई हजार ७९ परीक्षा केन्द्र निर्धारण गरिएको छ । परीक्षामा एक सय ५० जनासम्म परीक्षार्थी भएको केन्द्रमा एक जना सहायक केन्द्राध्यक्ष हुने छन् भने २० जना विद्यार्थी बराबर एक जना निरीक्षक खटिने भएका छन् । परीक्षामा ७५ जनाभन्दा कम परीक्षार्थी भएको केन्द्रमा सहायक केन्द्राध्यक्ष नराखिने जनाइएको छ ।

लेटर ग्रेडिङ प्रणालीमै यस वर्ष पनि परीक्षाको नतिजा सार्वजनिक गर्न तयारी गरिएको छ भने चैत १९ सम्म सञ्चालन परीक्षाको नतिजामा उत्तीर्ण दरमा ७० प्रतिशत पुर्‍याउने लक्ष्य राखेको छ । २०८० सालको एसइईमा ४८ प्रतिशत मात्रै विद्यार्थी पास भएका थिए ।