‘नो केबलकार समूह’का १८ जना धरौटीमा रिहा

ताप्लेजुङ प्रहरीको नियन्त्रणमा रहेका नो केबलकार समूहका अठार जना धरौटीमा रिहा भएका छन् ।

केबलकारविरुद्धको आन्दोलनका क्रममा पक्राउ परेकाहरुलाई जिल्ला अदालत ताप्लेजुङको आदेशअनुसार उनीहरु धरौटीमा रिहाई भएका हुन् । जिल्ला प्रहरी कार्यालय ताप्लेजुङका सूचना अधिकारी प्रहरी निरीक्षक विवेक बस्नेतका अनुसार पक्राउ परेका १८ जना सबैलले जनही २० हजार रुपैयाँका दरले घरौटी रकम बुझाएर रिहा भएका हुन् । गत फागुन १० र १२ गते पक्राउ परेकाहरुलाई जिल्ला अदालतको थुनछेक बहसपछि भएको आदेशअनुसार धरौटीमा रिहा गरिएको प्ररही निरीक्षक बस्नेतले जानकारी दिए ।

रिहाइ हुनेमा पाँचजना महिला र अन्य पुरुष रहेका छन् । यस्तै पक्राउ पर्नेहरु केही ताप्लेजुङका र अधिकांश सुनसरी, झापा, पाँचथर र मोरङका रहेका थिए । बिहीबार रिहा हुनेहरु पाथीभरा केबलकार विरोधका क्रममा गत फागुन ८ गते पाथीभरा क्षेत्रको काफ्लेपाटी र १० गते सदरमुकाम फुङ्लिङमा गरिएको प्रदर्शनमा आपराधिक उपद्रव र हुलदंगा गरेको आरोपमा पक्राउ परेका थिए ।

यता नो केबलकार पक्षअन्तर्गत मुक्कुम्लुङ ताङ्सेःप चुम्भो र मुक्कुमलुङ संरक्षण अन्तरदलीय संघर्ष समितिले केबलकारविरुद्ध आन्दोलनलाई निरन्तरता दिँदै वार्तामार्फत समाधान खोज्ने पक्षमा रहेको बताएका छन् ।