पुरन याक्खाको ‘गर्भभित्र’ र ‘झुपडी’ लोकार्पण

पुरन याक्खाद्वारा लिखित दुई कृति कविता संग्रह ‘गर्भभित्र’ र कथा संग्रह ‘झुपडी’ लोकार्पण भएको छ ।

शुक्रबार सुन्दर हरैंचा नगरपालिकाको तीनपैनीस्थित भानु साझा पुस्तकालयमा दुवै कृति एकसाथ लोकार्पण गरिएको छ । कार्यक्रमका प्रमुख अतिथि भाषाविद प्रा.डा. टंक न्यौपाने लगायत साहित्यकारहरुले संयुक्त रुपमा पुस्तकहरु लोकार्पण गरेका हुन् ।

सो अवसरमा कवि वम देवानले ‘गर्भ भित्र’ र प्राध्यापक टीका आत्रेयले ‘झुपडी’को समीक्षात्मक टीप्पणी गरेका थिए । कवि तथा साहित्यकारहरु मनु मञ्जिल, छवि वैरागी, सुकुना बहुमुखी क्याम्पसका पूर्वप्रमुख पितकुमार श्रेष्ठ, पुस्तकालयका पूर्व सभापति विरेस राई र लेखक तथा अनुसन्धाता केशु विरहीले सर्जक याक्खालाई बधाई तथा शुभकामना दिए । बाबा बस्नेत, रुपक श्रेष्ठ, विशाल गुरागाईं, प्रिन्स प्रमोद ढकाल र गिताप्रसाद श्रेष्ठ ‘रवि’ले ‘गर्भभित्र’का विभिन्न कविता वाचन गरेका थिए ।

याक्खाले ‘गर्भभित्र’मा २०४८ सालताका रचना गरेका कविताहरु संग्रहित रहेको बताए । कृतिलाई सबै पाठकहरूले पढेर प्रतिक्रिया दिन उनले आग्रह गरे । ‘आगामी दिनमा पनि साहित्यलाई निरन्तरता दिने नै छ । र, थप कृति प्रकाशित गर्ने तयारीमा पनि छु,’ उनले भने ।