आधुनिक गीतसंगीत प्रतियोगितामा संखुवासभाका परेश राई प्रथम

हीरक महोत्सवका अवसरमा सार्वजनिक प्रसारण नेपाल, रेडियो नेपालले आयोजना गरेको आधुनिक गीतसंगीत प्रतियोगितामा संखुवासभाका परेश राई प्रथम भएका छन् ।

रेडियो नेपाल स्थापनाको ७५औं वार्षिकोत्सव (हीरक महोत्सव)का अवसरमा सोमबार रेडियो नेपालको प्रांगणमा आयोजना गरिएको आधुनिक गीतसंगीत प्रतियोगितामा राई प्रथम भएका हुन् । यसैगरी, प्रतियोगितामा दीपिका श्रेष्ठ द्वितीय र पूर्णबहादुर विक तृतीय भएका छन् । विजेती तीनै जनालाई क्रमशः ४० हजार, ३० हजार र २० हजार नगदसहित प्रमाणपत्र प्रदान गरिने रेडियो नेपालले जनाएको छ ।

यसैगरी, प्रतियोगितामा चण्डीप्रसाद काफ्ले उत्कृष्ट संगीतकार र होम न्यौपाने उत्कृष्ट रचनाकार भए । उत्कृष्ट संगीतकार र उत्कृष्ट रचनाकारलाई २५ हजार नगदसहित प्रमाणपत्र प्रदान गरिनेछ । आधुनिक गीत प्रतियोगितामा विभिन्न कलाकारका २० वटा गीत छनौट भएका थिए । रेडियो नेपालका अनुसार प्रतियोगितामा विजयी भएका प्रतियोगीलाई रेडियो नेपाल स्थापनाको ७५औं वार्षिकोत्सव (हीरक महोत्सव)का अवसरमा पुरस्कार वितरण गरिने छ ।