याक्खा छुम्मा यूकेको वार्षिक भेटघाट कार्यक्रम सम्पन्न

किरात याक्खा छुम्मा यूके कमिटीको वार्षिक भेटघाट कार्यक्रम सम्पन्न भएको छ । शनिबार केन्टको आसफोर्डस्थित स्थानीय हलका कार्यक्रम भएको हो ।

कार्यक्रममा प्रमुख अतिथि छुम्माका केन्द्रीय अध्यक्ष भूपाल जिमीले संस्थाको विगत र वर्तमान अवस्थाबारे उल्लेख गर्दै भावी कार्ययोजनाबारे पनि जानकारी गराएका थिए । उनले यूकेको व्यस्त जीवनका वाबजूद भव्य कार्यक्रम आयोजना गरेकोमा किरात याक्खा छुम्मा यूकेको सराहना गरे ।

अध्यक्ष जिमीले हामी जहाँ रहे पनि आफ्नो माटो र सभ्यतालाई कहिल्यै भुल्न नहुने कुरामा जोड दिए । ‘पूर्खाहरुले जोगाएर राखिदिएको हाम्रो मौलिक हक-अधिकार हाल राज्यसत्ताबाट दिनानुदिन क्षय गर्ने कार्य भइरहेको छ । यसविरुद्व छुम्मा डटेर लागिरहेको छ,’ उनले भने ।

छुम्मा यूकेका अध्यक्ष बुद्धिराज जिमीले मुख्य गरी याक्खा दाजुभाई-दिदीबहिनीहरुबीच भेटघाट गर्ने उद्देश्यले नै बर्सेनि कार्यक्रम आयोजना गर्ने गरिएको बताए । ‘सालमा एक दिन भए पनि दाजुभाई, छोरीचेली, भानाभाञ्जा, ज्वाईंचेला र साथीभाईहरु भेट गरेर दुखसुखका कुरा साटासाट गर्नका खातिर यो कार्यक्रम गर्दै आएको छौं,’ उनले भने । अध्यक्ष जिमीले समितिका तर्फबाट हालसम्म भए/गरेका गतिविधि र कार्यक्रमका विषयमा पनि जानकारी गराएका थिए ।

कार्यक्रममा धनकुमारी कोम्फे याक्खालाई संस्थाप्रति पुर्‍याएको योगदानको कदर गर्दै सम्मान गरिएको थियो । त्यस्तै विभिन्न विश्वविद्यालयबाट अध्ययन पूरा गर्ने याक्खा परिवारका विद्यार्थीहरुलाई प्रमाणपत्र प्रदान गरिनुका साथै भर्खरै संस्थाको आजीवन र नयाँ सदस्यता लिने सदस्यहरुलाई स्वागत गरिएको थियो ।

कार्यक्रममा याक्खा जातिको सांस्कृतिक नृत्यहरु पनि प्रर्दशन गरिएको थियो । डोकेनी लाक, केई लाक (ढोल नाच)का साथै विभिन्न नृत्यहरु प्रस्तुत गरिएको थियो । सहभागीहरुलाई मौलिक खानपिनको समेत व्यवस्था गरिएको थियो ।

किरात याक्खा छुम्मा यूकेको गठन सन् २००८ मा भएको हो । कमिटीका पूर्वकोषाध्यक्ष शिवचन जिमीका अनुसार यस वर्षको कार्यक्रममा याक्खा छोरीचेलीसहित २ सय बढी सहभागी थिए ।

गत वर्ष भने अगस्ट १० हुने भनिएको बार्षिक भेला युकेमा शान्ति सुरक्षाको अवस्था प्रतिकुल भएको जनाउँदै स्थगित गरिएको थियो ।